Photo accredited to Sweat Army Gym


الموضوع حينكتب باللغه العاميه علشان اسهل على

نفسي الكتابه لاني ضعيفة نوعا ما باللغه العربيه (مع الأسف).

لاحظت في بنات كثير جديدين على الجيم والرياضه، الاغلب ينغش وينضحك عليه سواء بسعر النادي، باختيار النادي، …. الخ. وفِي ناس تتخوف انها تدخل النادي بحجة انه مكان جديد.

لذالك قررت اكتب هالمدونه بعد سنه من تجربتي مع النادي مع العلم اني ابدا ماعتبر مؤهله اني أتكلم بهالمجال لكن راح أشارك المعلومات الي فادتني علشان اساعدكم تبداون هالخطوه بشكل سليم.

راح اقسم الموضوع لثلاث أجزاء وبتكون على ٣ تدوينات مختلفه:

شلون تختارون النادي الي يناسبكم (وهو الجزء الي راح أتكلم فيه اليوم)
التحضيرات والاستعدادات للنادي وشلون تدخلونه ضمن نظام حياتكم
التمارين وترتيب الجدول

Photo accredited to Emilia


اختيار النادي

النوادي عندنا بالسعوديه جدا كثيره والاسعار متفاوته وغالبا مايجي السؤال فبالنا وش الفرق بينهم. فعلشان لاتندمون انكم ضيعتوا فلوسكم على مكان  و تعرفون ان هذا النادي يستاهل ويناسبك او لا، هذي التدوينه راح تسهل لكم رحلة البحث.

عالميا المفترض ان الخدمات والاجهزه والمعدات الي بالنادي هي الي تحدد السعر.

مع الأسف عندنا بالسعوديه تشوف نفس المعدات متكرره بأكثر من نادي مع نفس الخدمات لكن السعر متفاوت.

فعلشان تقررون النادي الي يناسبكم لازم تنتبهون لاهم ٥ عناصر:

  • الهدف من دخولك النادي.
  • ساعات دوام النادي
  • مسافة النادي عن بيتك
  • زوار المكان
  • خدمات النادي
Photo accredited to Pulse Studio sa
  • الهدف من دخولك النادي:

هذي اهم نقطه لازم تركزون عليها علشان تقررون باي مركز راح تحطون فلوسكم. هل انتي محتاجه تنحفين فقط ولا تنحفين وتشدين.

اذا اهم حاجه عندك انك تنزلين وزنك بتمارين بالكارديو بدون اوزان او أي معدات. انتي تحتاجين نادي فيه اجهزه كارديو زي السير والدراجه، وعندهم كلاسات كارديو متكرره طول اليوم. شوفي جدول الكلاسات عندهم وساعاته، واتاكدي انها تناسب جدولك. طبعا من حقك كزائره انك تاخذين جوله بالمكان فانتبهي لعدد أجهزة الكارديو وشوفي شكلها قديم ولا جديد وانتبهي اذا كلها شغاله ولا في عدد منها كبير طافي وخربان. وقت ماتاخذين جوله شوفي النادي على ايش مركز اكثر شي. عنده عدد كبير من أجهزة الكارديو وتركيزهم اكبرعلى أجهزة الكارديو والكلاسات ولا على معدات الاوزان وصالة الكروس فيت. لانك بهالحاله انتي تحتاجين نادي يعتمد على الكارديو والكلاسات اكثر وعادتا هالنوع من النوادي سعره قليل فحرام تدفعين على نادي متخصص لبناء الاجسام وموفرين أجهزة اوزان ومعدات متخصصه لكمال الاجسام وتاركين الكارديو مهمل وانتي تبين تشتغلين كارديو فقط! كانك عطيتيهم فلوسك عالفاضي فانتبهو لهالنقطه.

عادتا الموظفين لما ياخذونكم جولة يحاولون يبهرونكم بالمعدات والاجهزه الي عندهم فانتم حاولو تركزون على الي تبونه فقط علشان تعرفون تقيمون هل مبلغ النادي يوفر احتياجاتي ولا لا.

بالحاله الثانيه اذا انتي من الأشخاص الي تبغين ترسمين جسمك رسم وتشدينه وتبنين شوي عضل وتكبرين وتصغرين مناطق بجسمك (وانا افضل هالخيار) هنا لازم تركزين على أجهزة الاوزان ، صالة الكروس فيت والكارديو مع بعض.

نفس النقطه الي ذكرناها بالحاله الأولى ركزي عليها إضافة الى معدات الاوزان.

تاكدي عندهم جهاز سميث ماشين والكابل وتاكدي انهم شغالين مو خربانين لان هذول اهم جهازين راح تتمرنين عليهم وباشرحهم بالتفصيل بالجزء الثاني من المدونه.

تاكدي عندهم كمية كبيره جدا من الدمبلز واوزانهم متفاوته من كيلو الى ٦ كيلو وكل ماكثرت الكيلوات كل ماكان احسن واتاكدي انهم كلهم بحاله جيده وترتيبها تصاعدي. مهم جدا الباربيل وراح تحتاجين بعد الاوزان الي تتركب على البار تجي صفيحه دائريه حتكون موجوده جنب السميث ماشين القي نظره عليهم وشوفي كم اوزانهم عادتا بتلاقين الاوزان ١، ٢، ٥، ١٠، ٢٠ كجم وتاكدي ان عندهم كمية منهم لانك راح تستخدمينها وغيرك بيستخدمها فلازم يكون العدد كثير.

سواء كنتي تبغين تشتغلين كارديو ولا تبين ترفعين اوزان البنش مهم جدا وراح يساعدك بتمارين كثيره. البنش له أنواع كثيره واهم بنش الي يجيك يتعدل ظهره اما يكون بزاويه قائمة او مفرود بزاويه ١٨٠ درجه وانتي تعدلينه على كيفك. تاكدي انه موجود بالنادي وانهم يوفرون غيره أنواع كثيره منهم علشان لاتتورطين اذا احد استخدم البنش الي تبينه.

حطيتلكم تحت صورة مجمعه فيها كل الأسماء الغريبه الي قلتها بهالفقرة علشان تعرفونها لما تشوفونها بالنادي.

  • ساعات دوام النادي:

بما انك راح تدخلين النادي بنظام يومك لازم ترتبين جدولك وتخصصين ساعات من يومك للنادي. هالساعات لازم تتحدد قبل لاتبداين رحلة البحث عن النادي علشان تلاقين المكان الي يناسب ساعات جدولك. اسالي موظفة الاستقبال عن ساعات النادي، ساعات الكلاسات، متى يقفلون، هل يشتغلون باجازة الأسبوع او لا. وشوفي اذا الساعات حقتهم تناسب جدولك او لا. ابدا لاتضغطين على نفسك اذا جدول دوامهم مايناسب جدولك وفِي أيام متعارضه حتى لو يوم واحد اسحبي عليهم وشوفي غيرهم. ونصيحه مني ابدا لاتسجلين بنادي تروحينلهم قبل لايقفلون بساعه! الرياضه يبغالها تركيز وهدوء خصوصا اذا انتي مبتدئه راح تعيدين تمارين كثيره راح تلخبطين بالعد وراح تاخذين وقت عبال ماتتقنين التمرين بالطريقه الصحيحه. لذالك اختاري وقت التمرين يكون بداية او وسط اليوم واذا اتاخر الوقت ومامداك تعرفين ان النادي بيكون فاتح بالمساء ومايقفل بدري. اعتقد الأفضل النوادي الي تكون فاتحه بصورة مستمرة من ٩ صباح الى ١٠ المساء.

 

  • مسافة النادي عن بيتك:

باعتقادي ان الأفضل لو انتي عندك دوام او جامعة او التزامات بره البيت ماتختارين جيم قريب من مكان التزاماتك. نفسيا، أحيانا تكونين تعبانه من الدوام او من الجامعه ونفسيتك سيئه منه ومكان الجيم ملاصق لدوامك. تخيلي بس نفسيتك وانتي ماخذه نفس الطريق للدوام علشان تروحين للجيم! بتوصلين هناك وانتي اخلاقك بخشمك تذكرتي كل شي يذكرك بدوامك. من الجهه الثانيه، ممكن يكون دوامك بعيد عن بيتك ويوم من الايام قررتي انك ماتروحين للدوام لكن بتروحين للجيم، برضه راح تقطعين مسافه وقدرها بس علشان تروحين للجيم واحتمال كبير انك تكنسلين علشان المسافه وعلشان الطريق لايذكرك بالدوام ويخرب عليك اجازتك. لذالك اعتقد الأفضل انك تختارين نادي قريب من بيتك، بنفس المنطقه علشان تقدرين تروحينله متى ماتبين وبعيد كل البعد عن ارتباطاتك الأخرى. تقدرين تروحينله وقت اجازتك، ماتستبعدين المسافه، اذا ماتوفرت المواصلات يمديك تروحين باوبر وماتدفعين كثير او تروحين مشي على رجولك. المكان ذَا بيكون بيتك الثاني فاختاري مكان سهل توصلينله.

Photo accredited to womensbest.me
  • زوار المكان:

غالبا الناس ماتنتبه لهذي النقطه، او ممكن مايهمها زوار المكان قد مايهمها اسم النادي. سبحان الله مهما ايش كان المكان مرتب وجميل ومناسب لاحتياجاتك والنَّاس الي يجونه مانتي متعوده عليهم ماراح ترتاحين ابدا وراح تتبهذلين واحتمال كبير تكنسلين تروحين للنادي علشان لاتقابلينهم. الموضوع هذا ماله أي علاقه بالطبقيات، كل شخص يرتاح مع الناس الي يشبهونله وهذي حقيقه لامفر منها. اذا انتي متعوده على الناس البسيطه وماترتاحين حوالين الناس الي تهتم بالمظاهر ونفسيتك تتعب لما تشوفين ناس لابسه احسن منك او ملابسهم اغلى منك وماتقدرين تواكبينهم فلاتروحين تشتركين بنادي ڤي أي بي وتحسين نفسك غريبه بينهم والانظار كلها عليك وتراقبك وهم أصلا ولا دروا عنك. او ممكن تكونين نظيفه ومرتبه ومهذبه والنَّاس الي بالجيم مبهذلين ولسانهم طويل وريحة المكان مو حلوه بسببهم وصريخ وازعاج وضحك بصوت عالي واشكالهم تخوف ومريبه اكيد ماراح تستمرين بالمكان وبتهربين. لذالك اختاري المكان الي يناسب دائرتك الاجتماعيه وتحسين الناس الي فيه مثلك، طبعا اكيد بتقابلين شخص او اثنين مختلفين لكن اهم شي بشكل عام الناس ترتاحينلهم. كمان نقطه مهمه تنتبهين لها عدد زوار النادي، ابعدي كل البعد عن النوادي الزحمه وبنات المنطقه كلهم عليه، لايهمك اسم المكان ولا أي شي اذا انتي ماراح تتمرنين بسهوله. مكان زحمه معناته ماراح تجيك فرصه انك تتمرنين وتخلصين عالوقت الي انتي مخصصته بجدولك للنادي. راح يضيع يومك وانتي تنتظرين البنات يخلصون تمارينهم علشان تبداين تمرينك. وفري على نفسك الوقت واختاري مكان زواره عددهم يناسب إمكانيات ومساحة النادي. لذالك لما تروحين تلقين نظره عالنادي قبل لاتشتركين، اختاري الوقت الي النوادي فيها تكون زحمه، وغالبا وقت العصر من الساعه ٣-٥ تكون النوادي بأقصى ذروتها. تقدرين تشوفين عدد الناس الي بالنادي، اشكالهم، تصرفاتهم، ريحة المكان، ونظافته… الخ. لاتروحين الصباح او اخر الليل لما تكون النوادي فاضيه، القي نظره عليهم وهم بالزحمه وشوفي شلون الدنيا مبهذله ولا مرتبه.

 

  • خدمات النادي:

مع الأوضاع الان وفايروس كورونا، لازم تنتبهين لنظافة المكان. أصلا النادي لحاله اكبر مكان الواحد يقرف منه بدون أي سبب، لان الكل يصبصب عرق ويستخدمون كل الاجهزه الي انتي تستخدمينها. وبما انك بتلقين نظره عالمكان وهو بعز زحمته يمديك تشوفين هل في عاملات نظافه ينظفون المكان ويمسحون الاجهزه. معقمات الجيل متوفره، الحمامات نظيفة وريحتها كويسه، المناديل المعطره بكل مكان، الارضيات نظيفه، التكييف مناسب، ريحة المكان كويسه او لا ….الخ.  وهالاشياء كلها ماتبان الا لما يكون النادي بعز ذروته، علشان كذا مهم انك تزورينه وهو زحمه علشان تقررين يستاهل المبلغ او لا.

للاخوات الي يهتمون للمسبح، اذا شفتي ان إدارة النادي تطلب منكم تحاليل بول و فايروس الكبد ولازم تتروشين قبل المسبح اعرفي ان المكان نظيف. ريحة الكلور لما تطلع بالمسابح معناته ان المسبح وصخ ومايتنظف. اسالي الإدارة اذا يحللون عينات من المسبح او لا. المسابح النظيفه يهتمون انهم يحللون موية المسبح عالاقل أسبوعيا علشان يتاكدون انه نظيف والمواد المضافه قاعده تعطي مفعول.

من حقك كمشتركه بالنادي انه يوفر صابون بالحمامات وشامبو ومناديل بكل مكان ومعقمات مع لوكرات نظيفه وشغاله زين وماهي خشب علشان لايكون فيها صراصير وحشرات. النادي الي يتجاهل هالامور البسيطه ابعدي عنه!

Photo accredited to Joan MacDonald


اذا كملتي قراءة المدونه الى هذي الفقره احييك من قلبي، كلامي كان كثير. أتمنى اني ساعدتكم انكم تختارون النادي المناسب لكم ويغطي احتياجاتكم وماتضطرون تغيرونه كل فتره. هالخطوه جميله جدا وبتضيف لحياتكم شعور مميز. راح تحسون انكم ارشق واحلى واخف، بيتجدد يومكم اول ماتخرجون من النادي. انسو الميزان وانتظموا بالنادي وشوفوا شلون الإحساس والنفسيه والشكل بيتغيرللافضل. ولاحد يتحجج انه ماعنده وقت، اذا عندك وقت للخرجات والزواجات والمطاعم فانتي عندك وقت للنادي.

بالتدوينه الجايه ان شاء الله راح أتكلم عن أنواع الاجهزه ونظام النادي علشان لما تدخلون ما كانكم جدد ولا تقعدون تسالون احد ولا تضطرون تطالعون بالبنات ايش يسوون وتسون مثلهم. بحاول احطلكم كل الملعومات علشان تدخلون بقلب جامد وكانكم متعودين عالوضع ومدركين الشغله.

شاركوني بالتعليقات ارائكم واذا عندكم أسئلة او حابين تضيفون أي نصيحه للبنات.

اشوفكم بالمدونه الجايه،

8 thoughts on “نصائح لاختيار النادي المناسب (للمبتدئين)

  1. جميلتي انا، اكثر شي مزعلني اني قفلت حسابي بتويتر لذلك مهما علقت عليك مارح يوصلك بس بكل الاحوال كل شي تكتبينه اقراه بحماس وكأني اسمع سوالف صديقه عزيزه! قريت الموضوع حرف حرف مع اني ما اهتم للرياضه ابد ولا احبها وكمان قريته وانا تو طالعه من الدوام وانتظر سواقنا ومتجمده من البرد بس شفتي شكثر احبك واحب سواليفك؟ ❤️

    1. ططططططييييييييففففففف تصدقين عاد اني فاقدتك من تويتر 😭😭😭 ياحبي لك تعليقك اثلجلي صدري والله ❤️❤️❤️❤️❤️

  2. اول شي شكرا على المجهودك اللطيف 🤍🤍
    تاني شي في فكرة مره حلوه شفتها في نادي الجامعه في امريكا هيا انهم يوفرو خِرق او مناشف صغيره وبخاخات تعقيم وكل شخص يمسح الجهاز بعد الاستخدام او قبل وبعد الاستخدام 👍🏻

    1. ايه حتى هالخدمات يوفرونها بالنادي الي اروحله بس مادري اذا كل النوادي يطبقونها او لا. عاد اذا ماسوو كذا قمة الوصاخه صدق 😭 !

  3. شكرا كثير عزيزتي على التفاصيل الهامة جدا و اللي قليل ما يتطرق لها البعض، اثرتي نقطة جدا مهمة لما ذكرتي طبيعة الناس اللي في النادي و هاذي عن تجربة فعلا تفرق مع الشخص طريقة تعامل البعض او النظافة الشخصيه و احب اضيف سيدتي الفاضلة ملاحظة تتعلق بمدى ثقافة الكوتش و وعيها مع الحالات اللي متعرضة لاصابات و ايضا أخصائية التغذية لما تكون نمطية او مش واعية لاحتيات المتدربة
    شكرا مرة ثانية على دقة الطرح و ربي يسعدك

    1. صح عليك جوهره. ذكرتي نقطتين مهمه جدا خصوصا للمبتدئات، اخصائية التغذيه والكوتش حقت الصاله. خصوصا الكوتش لو ماكانت منتبهه للبنات ممكن تسوين حركة غلط او تتمرنين غلط ومانتي داريه عن نفسك ولا احد ينبهك وتروحين فيها 😭

Leave a Reply to Amna Cancel reply

Your email address will not be published. Required fields are marked *